Қазақстан жасанды жаңбыр технологиясын енгізетін алғашқы елдердің қатарына қосылмақ. Президент Қасым-Жомарт Тоқаев БҰҰ Дүниежүзілік метеорология ұйымының президенті Абдулла Әл-Мандусты қабылдап, осы бағыттағы ынтымақтастықты талқылады, деп хабарлайды Zhaiyqmedia.kz ақпарат агенттігі.
Кездесуде жасанды жаңбыр технологиясын енгізудің алғашқы кезеңі талқыланды. Жоба алдымен төрт аймақта – Атырау, Маңғыстау, Қызылорда және Түркістан облыстарында сыналады. Бұл өңірлерде қуаңшылық жиі кездеседі, ал жасанды жаңбыр ауыл шаруашылығына үлкен көмек болмақ.
«Біздің мақсатымыз – климаттың өзгеруіне бейімделу. Жасанды жаңбыр – заманауи әрі тиімді тәсіл. Бірлескен жұмыс нәтижесінде Қазақстанда метеорологиялық зерттеулерді дамытуға мүмкіндік туады», – деді Абдулла Әл-Мандус.
Технологияны енгізуге Біріккен Араб Әмірліктерінің мамандары көмектеседі. Олардың тәжірибесі – әлемдегі ең озықтардың бірі. Қазақстандық ғалымдар да осы бағытта білім алып, жергілікті жағдайға бейімделген әдістерді әзірлемек.
