Қазақстан мектептерінде төртінші тоқсан 25 мамырда аяқталады. Оқу жылының соңына аз уақыт қалғандықтан, бітіруші түлектер мен 9-сынып оқушылары емтихан кестесін күтіп отыр, деп хабарлайды Zhaiyqmedia.kz ақпарат агенттігі.
Биылғы оқу жылында 11-сынып түлектері үшін қорытынды аттестаттау 28 мамырдан 11 маусымға дейін өтеді. Емтихандар екі кезеңнен тұрады: міндетті пәндер және таңдау пәндері.
Оқу-ағарту министрлігінің мәліметінше, 28 мамыр – қазақ тілі мен әдебиеті, 30 мамыр – орыс тілі мен әдебиеті, 3 маусым – шет тілі, 5 маусым – математика, 7 маусым – Қазақстан тарихы бойынша емтихан өтеді. Ал 11 маусым – таңдау пәндерінің күні.
9-сынып оқушылары үшін қорытынды аттестаттау 29 мамырдан 12 маусымға дейін созылады. Олар төрт пән бойынша емтихан тапсырады: қазақ тілі, орыс тілі, математика және таңдау пәні.
Емтихан кестесін БҚО білім басқармасы да растады. Орал мектептеріндегі оқушылар да осы кесте бойынша сынақ тапсырады.
