Сурет: Бас прокуратура
Мемлекет басшысының келісімімен және Бас Прокурордың бұйрығымен аға әділет кеңесшісі Жандос Нарымбетұлы Әбдібаев Жамбыл облысының прокуроры болып тағайындалды, деп хабарлайды Zhaiyqmedia.kz ақпарат агенттігі.
Бас прокуратураның мәліметінше, Жандос Әбдібаев еңбек жолын Алматы қаласы Түрксіб ауданы прокурорының көмекшісі ретінде бастаған. Әр жылдары ол Алматы қаласы Бостандық ауданы прокурорының орынбасары, Алматы қаласы прокуратурасының Жедел-іздестіру, қарсы барлау және жасырын тергеу әрекеттерінің заңдылығын қадағалау басқармасының бастығы, сондай-ақ Алматы қаласы прокуратурасы Аппаратының басшысы қызметтерін атқарған.
2022 жылдың тамызынан бастап Алматы қаласы прокурорының орынбасары болып жұмыс істеген. Қызметтік міндеттерін мінсіз орындағаны үшін II дәрежелі «Айбын» орденімен марапатталған.
