АҚШ президенті Дональд Трамптың әкімшілігі дәстүрлі бұқаралық ақпарат құралдарын айналып өтіп, азаматтармен тікелей байланыс орнатуға мүмкіндік беретін жаңа мобильді қосымшаны іске қосты, деп хабарлайды Zhaiyqmedia ақпарат агенттігі.
Ақ үй бұл платформаны президент Дональд Трамп пен Америка халқы арасындағы ашықтықты қамтамасыз ететін жаңа құрал ретінде таныстырды. Қосымшаны әзірлеушілердің айтуынша, бұл – артық ақпараттық шусыз, «сүзгіден өтпеген» жаңалықтарды нақты уақыт режимінде алудың тиімді жолы.
Қосымшаның негізгі мүмкіндіктеріне әкімшіліктің маңызды жарлықтары, кадрлық шешімдері мен басым міндеттері туралы жедел хабарламалар, сондай-ақ президенттің брифингтері мен сөйлеген сөздерінің монтаждалмаған тікелей эфирлері кіреді. Бұдан бөлек, пайдаланушылар өз пікірлері мен ұсыныстарын тікелей әкімшілікке жолдай алады және Ақ үй өмірінен алынған эксклюзивті фото-видео материалдарды тамашалай алады.
«Бұл – әкімшілікпен хабарласып, жаңалықтарды біліп отырудың ең жылдам әрі тиімді жолы. Ақпарат тікелей Сопақ кабинеттен сіздің телефоныңызға келіп түседі», — делінген ресми хабарламада.
Бұл қадам Трамптың ірі медиахолдингтермен қарым-қатынасы шиеленіскен тұста күн тәртібін қалыптастыру үшін жеке цифрлық арналарды пайдалану стратегиясын айқындайды. Осылайша, жаңа қосымша Ақ үй үшін қоғамдық пікірге ықпал етудің негізгі тетіктерінің біріне айналмақ.
Қосымшаны App Store және Google Play платформаларынан жүктеп алуға болады.
Фото: Әлеуметтік желіден
