Париж Олимпиадасының чемпионы Елдос Сметов ұзақ үзілістен кейін халықаралық жарысқа қайта шығады. Ол маусым айының 26-28 аралығында Қытайдың Циндао қаласында өтетін Гран-при турниріне қатысады, деп хабарлайды Zhaiyqmedia.kz ақпарат агенттігі.
Бұл – Сметовтің Олимпиададан кейінгі алғашқы ірі турнирі. Отандық дзюдо жанкүйерлері чемпионның қайта оралуын асыға күтіп жүр.
Елдос Сметов – Қазақстанның мақтанышы. Ол Парижде алтын алған соң біраз уақыт демалып, қайта дайындалуға кіріскен еді. Енді ол Циндаода өз шеберлігін көрсетпек.
«Менің мақсатым – ел намысын қорғап, жеңіске жету. Қытайға барып, мықтылармен бақ сынасуға дайынмын», – деді Сметов.
Қазақстан құрамасы турнирге толық құрамда қатысады. Ал Сметов өз салмақ дәрежесінде бақ сынайды.
