Сурет:gov.kz
2025 жылы Қазақстанда мұнай-газ химиясы саласы тұрақты дамып, өнім өндіру көлемі өткен жылмен салыстырғанда 12%-ға артты. Энергетика министрі Ерлан Ақкенженовтің хабарлауынша, саланың дамуы экономиканың шикізатқа тәуелділігін азайтуға және экспорттық әлеуетті арттыруға бағытталған. Отандық мұнай-газ химиясы терең өңделген полипропилен, бензол және параксилол сияқты өнімдерді тұрақты түрде сыртқы нарықтарға жеткізу арқылы ел экономикасына қосымша құн енгізуде.
Саланың стратегиялық дамуы ірі өндірістік жобалармен тығыз байланысты. Атырау облысында полиэтилен зауытының болашақ пиролиз қондырғысының құрылысы 30%-дан астамға орындалған. Павлодарда алкилат шығаратын зауыттың құрылыс жұмыстары басталды. Мұндай жобалар Қазақстанның мұнай-газ химиясы секторын әлемдік стандартқа сәйкестендіруге және шикізат емес экспорт көлемін ұлғайтуға мүмкіндік береді.
