Қазақстан президенті Қасым-Жомарт Тоқаев Қырғыз Республикасының президенті Садыр Жапаровпен телефон арқылы сөйлесті, деп хабарлайды Zhaiyqmedia ақпарат агенттігі.
Ақорданың баспасөз қызметінің хабарлауынша, Садыр Жапаров Қасым-Жомарт Тоқаевты Қазақстандағы жалпыхалықтық референдумның сәтті өтуімен шын жүректен құттықтады.
Қырғызстан президенті жаңа Конституция бойынша дауыс беру нәтижесі қазақстандықтардың Қасым-Жомарт Тоқаев жүргізіп отырған елді саяси және әлеуметтік-экономикалық жаңғырту бағытын толық қолдайтынын көрсететінін атап өтті. Мемлекет басшысы Садыр Жапаровқа қолдауы мен Қырғызстаннан келген байқаушылардың белсенді қатысқаны үшін ризашылығын білдіріп, конституциялық реформалар мемлекеттік басқарудың тиімділігін арттыруға және азаматтардың әл-ауқатын жақсартуға бағытталғанын жеткізді.
Сонымен қатар тараптар қазақ-қырғыз көпжақты қарым-қатынасын одан әрі нығайту мәселелерін талқылап, екі ел арасындағы стратегиялық серіктестік пен одақтастықты тереңдетуге мүдделі екендерін растады.
Фото: Әлеуметтік желіден
