Орал қаласында Қорғаныс істері жөніндегі басқарманың ғимараты күрделі жөндеуден өтіп, қайта пайдалануға берілді. Нысанның жаңаруы қала әкімдігінің қолдауымен жүзеге асқан.
1973 жылы салынған ғимараттың қасбеті мен ішкі бөлмелері толық жөнделіп, электр жүйесі жаңартылды. Ашылу рәсіміне қала әкімі Мұрат Байменов, БҚО Қорғаныс істері жөніндегі департаментінің бастығы, полковник Әсембек Ахметов және авиация генерал-майоры, ардагерлер қауымдастығының төрағасы Хайретдин Рысқалиев қатысты.
Мұрат Байменов өз сөзінде:
«Бұл ғимарат – елдің қорғаныс қабілетін нығайту мен жастардың патриоттық тәрбиесінде маңызды орын алады. Жөндеу жұмыстары – мемлекетіміздің қорғаныс саласына деген назарын көрсетеді. Мұндай нысандарды жаңарту арқылы біз жас буынды Отанға қызмет етуге ынталандырамыз», – деді.
Салтанатты шарада бірқатар қызметкерлерге «Қазақстан патриоты» төсбелгілері табысталды. Марапаттарды басқарма бастығы, подполковник Бауыржан Есенбеков тапсырды.
Кездесу соңында қатысушылар жаңартылған ғимаратты аралап, жаңа жұмыс жағдайымен танысты.
