Сурет: istockphoto.com
Батыс Қазақстан облысында арнайы жабдықталмаған аумақта шомылуға барған үш жасөспірім қаза тапты, деп хабарлайды Zhaiyqmedia.kz ақпарат агенттігі.
Облыстық Төтенше жағдайлар департаментінің мәліметінше, 2008 және 2009 жылы туған үш жасөспірім суға батып кеткен. ТЖМ бөлімшелері келгенге дейін қаза болғандардың денесін жергілікті тұрғындар судан шығарған.
«112 пультіне Батыс Қазақстан облысы ТЖД жедел кезекшісіне полиция бөлімінің кезекшісінен хабарлама түсті. Оқиға орнына ТЖД күштері жедел түрде жіберілді. Оқиғаның мән-жайы мен себептері анықталып жатыр», делінген хабарламада.
Жаз мезгілінде шомылу аймақтарында балалардың суға кету жағдайлары жиілеп кеткен. Соңғы бір айда Түркістан, Ақмола, Қарағанды, Қостанай және Қызылорда облыстарында осындай оқиғалар тіркелген. ТЖМ қызметкерлері шомылу кезінде қауіпсіздік ережелерін қатаң сақтауға шақырады.
