Петропавлда синтетикалық есірткі сатумен айналысқан 33 жастағы қала тұрғыны қылмыс үстінде ұсталды, деп хабарлайды Zhaiyqmedia ақпарат агенттігі.
Полиция қызметкерлері күдіктіні 3-ші қалалық аурухана маңында қолға түсірген. Жеке тінту кезінде оның жанынан 22 түйіншек есірткі табылды.
Кейін күдіктінің өз жауабы арқылы жасырын қоймадан тағы үш түйіншек тәркіленді. Сот-медициналық сараптама бұл аса қауіпті α-PVP психотропты заты екенін, ал жалпы салмағы 25 грамды құрайтынын растады.
Тергеу барысында оның бұл заңсыз «бизнесті» өткен жылдың қараша айынан бері жүргізіп келгені белгілі болды.
Енді оған аса ірі мөлшерде есірткі сатқаны үшін 12 жылға дейін бас бостандығынан айыру жазасы қарастырылған. Қазіргі уақытта күдікті уақытша ұстау изоляторына қамалды.
Фото: Әлеуметтік желіден
