Сурет: Egemen Qazaqstan
Қазақстанда декреттік демалыстағы әскери қызметшілердің қызмет өтіліне қатысты түсініктеме берілді, деп хабарлайды Zhaiyqmedia.kz ақпарат агенттігі.
Қорғаныс министрінің орынбасары Асқар Мұстабековтің айтуынша, Сенат әскери қызметшілердің құқықтық жағдайын жақсартуға бағытталған заңнамалық өзгерістерді қабылдады. Жаңа заң бойынша, шақыру бойынша қызмет өткеріп жатқан офицердің үш жасқа дейінгі бала күтімі демалысында болған уақыты міндетті қызмет мерзіміне есептелмейді.
Вице-министр түсіндіргендей, егер әскери қызметші бала күтімі демалысына шықса, оның қызмет уақыты тоқтатылады. Демалыс аяқталған соң қалған қызмет мерзімін жалғастырады. Мысалы, алты ай қызмет етіп, декретке шыққан офицерге қалған 18 айды өтеу міндеттеледі.
Қазіргі уақытта 42 офицер декреттік демалыста. Олар әскери оқу орындарын бітіріп, әскери кафедрада дайындықтан өткеннен кейін екі жылдық қызметке жіберілген мамандар. Министрлік өкілі жаңа заңның кері күші жоқ екенін атап өтті.
