Жамбыл облысында мерзімді қызметтегі сарбаз Еркебұлан Рүстемұлының қазасына қатысты іс сотқа жолданды. Басты айыпталушы – оның рота командирі, деп хабарлайды Zhaiyqmedia ақпарат агенттігі.
Бас әскери прокуратураның мәліметінше, рота командиріне қызметіне салғырт қарады деген айып тағылған. Тергеу нұсқасы бойынша, офицер бөлімшедегі тәртіп пен қару-жарақ қауіпсіздігін бақылаусыз қалдырған.
Сонымен қатар оған марқұмның қызметтестеріне қатысты билігін асыра пайдаланды деген де кінә артылып отыр.
Қайғылы оқиға 27 қаңтарда Гвардиялық гарнизонда болған. Сарбаз кезекшілікте тұрғанда оқ тиіп, мерт болды. Прокурорлар офицердің кінәсіне сенімді болғанымен, оның туыстары бұл пікірмен келіспейді. Олар командирдің әрекеті мен сарбаздың өлімі арасында тікелей байланыс жоқ деп санайды.
Сарбаздың қазасына қатысты басқа да мән-жайларды тергеу әлі жалғасып жатыр.
Фото: Әлеуметтік желіден
