5 шілде күні АҚШ-тың танымал миллиардері Илон Маск өзінің жаңа саяси партия құрғанын мәлімдеді. «Америка» деп аталатын бұл партия азаматтарға бостандықты қайтаруды мақсат етеді.

Миллиардердің айтуынша, партияны құру туралы шешім X (бұрынғы Twitter) әлеуметтік желісінде өткен сауалнамадан кейін қабылданған. Дауыс бергендердің 65,4%-ы жаңа саяси күштің қажет екенін қолдаған.

«Елімізді ысырап пен жемқорлық құрдымға кетіріп жатыр. Біз шын мәнінде демократияда емес, бірпартиялы жүйеде өмір сүріп отырмыз. Сондықтан “Америка” партиясы құрылды — сіздерге еркіндікті қайтару үшін», — деді Маск әлеуметтік желідегі жазбасында.

Илон Масктың айтуынша, бұл партия билік үшін күрес жүргізбейді, алайда АҚШ Сенатында 2–3, ал Өкілдер палатасында 8–10 орын алуды көздейді.

Жаңа бастама Илон Маск пен АҚШ президенті Дональд Трамп арасындағы келесі саяси қақтығыспен тұспа-тұс келіп отыр. Бұған дейін Маск Республикалық партияның басты заң жобасы — Big Beautiful Bill-ге қарсы шыққан болатын және оның қабылданғаны жағдайда жаңа партия құратынын мәлімдеген. Бұл заң 5 шілдеде Трамптың қол қоюымен күшіне енді.

Айта кетейік, Forbes журналының бағалауынша, Илон Маск әлемдегі ең бай адам болып саналады — оның байлығы шамамен 405 миллиард доллар. Ол бұған дейін Трамптың сайлауалды кампаниясын қаржылай қолдағанымен, бүгінде өзін не демократтарға, не республикашыларға жатқызбайтынын нақты айтты.