Президент Қасым-Жомарт Тоқаев «Қазақтелеком» АҚ басқарма төрағасы Бағдат Мусинді қабылдады, деп хабарлайды Zhaiyqmedia ақпарат агенттігі.
Кездесуде Бағдат Мусин мемлекет басшысына компанияның соңғы екі жылда атқарған жұмыстары мен негізгі жобаларының нәтижелері туралы есеп берді. Оның айтуынша, қазіргі уақытта «Қазақтелеком» 1,75 миллионнан астам үй шаруашылығына қызмет көрсетеді және телекоммуникация нарығындағы көшбасшылық орнын сақтап отыр.
Компания басшысы елді мекендерді байланыспен қамту жұмыстарының жалғасып жатқанын атап өтті. 2027 жылдың соңына дейін 1 миллионнан астам адам тұратын 3 мыңнан астам ауылға сапалы байланыс жеткізу жоспарланған.
Сонымен қатар «Каспий» суасты талшықты-оптикалық байланыс желісі халықаралық жобасының іске асырылу барысы талқыланды. Бұл жоба Ақтау мен Сумгаит қалаларының арасына кабель тарту арқылы Еуропа мен Азия арасында цифрлық дәліз құруды көздейді. Бұл бастама Қазақстанның транзиттік әлеуетін едәуір арттыруға мүмкіндік береді.
Кездесуде деректерді өңдеу инфрақұрылымын дамытуға да ерекше назар аударылды. Осы мақсатта Екібастұз қаласында «Деректерді өңдеу орталығы алқабы» атты стратегиялық жоба аясында заманауи орталық салынып жатыр. Бұл халықаралық технологиялық компанияларды тартуға және елдің инвестициялық ахуалын жақсартуға септігін тигізеді.
Бағдат Мусиннің сөзінше, компания жасанды интеллект технологияларын енгізуге басымдық беріп отыр. Қазірдің өзінде корпоративтік процестерді автоматтандыру, киберқауіпсіздікті күшейту және мемлекеттік секторды цифрландыру бойынша бірқатар жоба қолға алынған.
Президент шағын қалалар мен ауылдарды сапалы байланыс және интернетпен қамтудың маңызын атап өтіп, цифрландыру мен жасанды интеллектіні дамыту саласындағы инвестициялық жобаларды уақтылы іске асыруды тапсырды.
Фото: Әлеуметтік желіден
