Соңғы кездері әлеуметтік желіде «хайп» үшін табиғи және тарихи нысандарды бүлдіру жиілеп кетті. Ішкі істер министрлігі мұндай әрекеттерге қылмыстық жауапкершілік қарастырылғанын ескертеді.
Ведомство өкілдерінің айтуынша, табиғи парктер, қорықтар мен тарихи ескерткіштерге келтірілген залал үшін кінәлілерге 3 жылға дейін бас бостандығынан айыру жазасы тағайындалуы мүмкін.
«Мұндай әрекеттер – қоғамға қарсы қылмыс. Біз әрбір фактіні тіркеп, тергеп жатырмыз. Әлеуметтік желіде танымал болу үшін табиғатты бүлдіру – заңсыз», – деді ІІМ ресми өкілі.
Өзге де аймақтар сияқты Батыс Қазақстан облысында да табиғи нысандарды қорғау шаралары күшейтілген. Жайық өңіріндегі ерекше қорғалатын аумақтарда бейнебақылау камералары орнатылып, рейдтер тұрақты жүргізілуде.
Азаматтарды табиғат пен тарихқа ұқыпты қарауға шақырамыз. Кез келген бұзушылық туралы полицияға хабарлауға болады.
