Халықаралық бокс федерациясы (IBF) допинг дауынан кейін қазақстандық боксшы Жәнібек Әлімханұлын орта салмақтағы жаңартылған рейтингінен алып тастады, деп хабарлайды Zhaiyqmedia ақпарат агенттігі.
Ұйымның ресми сайтында жарияланған жаңа тізімде қазақ боксшысының есімі жоқ. Қазіргі уақытта IBF тұжырымы бойынша чемпиондық атақ бос тұр, сондай-ақ рейтингтің бірінші сатысына да ешкім жайғаспаған.
Рейтингте екінші орынға италиялық боксшы Этиноза Олиха көтерілсе, үшінші орында жеңіліп көрмеген ирландиялық спортшы Аарон Маккенна тұр.
Бұған дейін тағы бір беделді портал – Boxrec те Жәнібек Әлімханұлын өз рейтингінің көшбасшылар қатарынан шығарған болатын.
6 желтоқсанға жоспарланған үш титулдық жекпе-жек қарсаңында Жәнібек Әлімханұлының аты допинг дауына іліккен еді.
Фото: Әлеуметтік желіден
