Ұлытау облысында «Таза Қазақстан» экологиялық бағдарламасы аясында жыл басынан бері 2 мың тоннадан астам қоқыс жиналып, шығарылды, деп хабарлайды Zhaiyqmedia.kz ақпарат агенттігі.
Бұл бағдарламаны ҚР Президенті Қасым-Жомарт Тоқаев бастап, өңірлерде экологиялық тазалықты сақтауға басымдық берілуде. Облыс әкімдігінің мәліметінше, қоқыс шығару жұмыстарына жергілікті тұрғындар мен волонтерлер белсенді қатысқан.
«Біз тек қоқыс жинап қана қоймай, халықты табиғатты қорғауға шақырамыз. Әрбір адам өз үйінің маңын таза ұстаса, жалпы экологиялық ахуал жақсарады», – дейді облыс әкімінің орынбасары Нұрлан Серікқалиев.
Экологиялық акция аясында өзен жағалаулары, саябақтар мен көшелер тазартылған. Жиналған қоқыстың басым бөлігі тұрмыстық қалдықтар мен пластик. Жоспар бойынша жыл соңына дейін тағы 1 мың тонна қоқыс шығару көзделген.
