Президент Қасым-Жомарт Тоқаев «Таза Қазақстан» экологиялық акциясында қаңғыбас иттердің тұрғындарға төндіретін қаупіне тоқталды. Ол бұл мәселе әлі күнге дейін өткір күйінде қалып отырғанын айтты, деп хабарлайды Zhaiyqmedia.kz ақпарат агенттігі.
Мемлекет басшысы қаңғыбас иттерден балалар мен ересектердің жиі зардап шегетінін еске салды. Оның айтуынша, бұл – жануарларға деген жауапкершіліксіз қараудың салдары.
«Қаңғыбас иттердің шабуылынан зардап шеккендердің саны азаймай тұр. Бұл – біздің ортақ ұятымыз», – деді Президент.
Тоқаев жергілікті әкімдіктерге мәселені кешенді түрде шешуді тапсырды. Ол иттерді ату немесе улау сияқты қатыгез әдістерге жол берілмейтінін, тек гуманистік тәсілдер қолданылуы керектігін атап өтті.
«Таза Қазақстан» акциясы аясында қаңғыбас жануарлардың санын азайту үшін арнайы бағдарламалар әзірлеу жоспарланып отыр. Бұл бағытта ветеринариялық қызметтер мен еріктілердің көмегі маңызды рөл атқарады.
