Батыс Қазақстан облысының Ақжайық ауданында кәмелетке толмағандардың істері және олардың құқықтарын қорғау жөніндегі комиссияның көшпелі отырысы өтті. Жиынға облыс әкімінің орынбасары Қанат Мендіғалиев төрағалық етсе, аудан әкімі Мұрат Сердалин қатысты.

Басқосуда Мемлекет басшысының «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу жолдары» атты Жолдауында көтерілген міндеттер негізге алынды.

Комиссия жұмысының басты бағыты – балалардың құқықтарын қорғау. Бұл ретте ведомствоаралық өзара іс-қимылды күшейту, буллинг пен аутодеструктивті мінез-құлықтың алдын алу, «ДосболLIKE» бағдарламасын дамыту, әлеуметтік жобаларды іске асыру мәселелері қаралды.

Қанат Мендіғалиев өз сөзінде цифрландыру арқылы балаларды қорғауды жаңа деңгейге көтерудің маңызын атап өтті. Оның айтуынша, мониторинг жүйелері мен жасанды интеллект алгоритмдерін енгізу қауіптің алдын алуға жол ашады. «Көмек Stop bullying» жобасы сияқты тәжірибелерді кеңейту қажеттігін де айтты.

Отырыс соңында алдағы кезеңге арналған нақты тапсырмалар беріліп, бірлескен жұмыстың басым бағыттары айқындалды.