Қоғам белсендісі Абзал Достияров әлеуметтік желіде журналист Нұртаза Қадырниязовтың полиция тарапынан ұсталғанын хабарлады. Оның айтуынша, құқық қорғау органдары бүгін журналистің үйіне барып, оны Әуезов аудандық полиция бөліміне жеткізген.

Достияровтың айтуынша, Қадырниязов қысқа байланысқа шыққан сәтінде өзіне қатысты шағым түскенін жеткізген. «Нұртаза аға – философия ғылымдарының кандидаты, мәдениетті, зиялы адам. Оның біреуді қорлайтындай сөз айтуы мүмкін емес», – деп жазды белсенді.

Сондай-ақ ол журналистің жақында Қазақстандағы қытайлық мигранттарға байланысты пікір білдіргенін еске салды.

Бұған дейін, 2023 жылдың маусымында, ҚазТАГ агенттігі Нұртаза Қадырниязовтың «ДАТ» – «Қоғамдық ұстаным» басылымының бас редакторы қызметіне келгенін хабарлаған болатын.

Сурет: Ашық дереккөз