Сурет: Egemen Qazaqstan
Венесуэлада құтқарушылар 11 жастағы баланы үш күн бойы үйінді астында қалғаннан кейін тірідей тапты. Бұл туралы президент міндетін атқарушы Делси Родригес өз видеосында көрсетті, деп хабарлайды Zhaiyqmedia.kz ақпарат агенттігі.
Видеода құтқарушылар каска мен жарық шағылыстыратын арнайы киім киіп, үйінді астынан баланы алып шығып, зембілге жатқызған. Операция түнде прожекторлар мен шамдардың жарығымен жүргізілген.
«Жақында Карабальеде 11 жастағы бала тірі күйінде құтқарылды. Қазір аман сақталған әрбір өмір Венесуэла үшін үміт», — деді Родригес.
Бір күн бұрын Ла-Гуайрада құтқарушылар Моисес есімді тағы бір 11 жастағы баланы үйінді астынан алып шыққан. Ол шамамен үш метр тереңдікте жатқан, мамандар оған жету үшін алты сағат жұмсаған.
