Әлеуметтік желіде «Жаңа Конституция жобасында шетелдіктерге жер сатуға салынған тыйым алынып тасталды» деген ақпарат тарап жатыр. Жалған ақпаратқа қарсы іс-қимыл орталығы бұл мәліметті ресми түрде жоққа шығарды, деп хабарлайды Zhaiyqmedia ақпарат агенттігі.
Орталықтың мәлімдеуінше, тараған ақпарат шындыққа жанаспайды және фактілерді қасақана бұрмалау болып саналады.
«Қолданыстағы Конституцияның 6-бабы 3-тармағындағы «жер жəне оның қойнауы, су көздері, өсімдіктер мен жануарлар дүниесі, басқа да табиғи ресурстар» туралы норма жаңа жобада еш өзгеріссіз сақталды», — деп атап өтті ведомство.
Конституциялық реформа жөніндегі комиссия да бұл норманың өзгермейтінін растаған. Сонымен қатар, жаңа жобада мемлекеттің тұтастығы мен унитарлығы, басқару үлгісі сияқты базалық қағидаттардың өзгермейтіні туралы ережелер негізгі тарауларға енгізіліп, оның құқықтық кепілдіктері айтарлықтай күшейтілген.
«Шетелдіктерге жер сатуға тыйым салуды алып тастау туралы мәлімдемелердің ешқандай құқықтық негізі жоқ. Фактілерді әдейі бұрмалау және жалған ақпарат тарату заң алдында жауапкершілікке әкеп соғуы мүмкін. Азаматтарды және БАҚ өкілдерін ақпаратты тек ресми дереккөздерден тексеруге шақырамыз», — делінген орталық хабарламасында.
