Дания мен Гренландияның АҚШ-тағы өкілдері Арктикадағы аралға қатысты талаптан ресми Вашингтонды бас тартуға көндіруге тырысып жатыр, деп жазды Associated Press.
Данияның АҚШ-тағы елшісі Йеспер Меллер Серенсен мен Гренландияның Вашингтондағы бас өкілі Якоб Исбосетсен бейсенбі күні Ақ үйдің Ұлттық қауіпсіздік кеңесінің мүшелерімен жүздескен.
Бұл туралы аты-жөнін жарияламауды сұраған Дания үкіметіндегі дереккөздер ақпарат берген.
АҚШ президенті Дональд Трамп бұған дейін Гренландияны бақылауға алғысы келетінін ашық мәлімдеген еді. Алайда Ақ үй аталған кездесуге қатысты пікір білдіруден бас тартқан.
Осы аптада Дания мен Гренландия тарапынан бірнеше америкалық заң шығарушымен келіссөздер жүргізілгені айтылады.
Associated Press дерегінше, алдағы аптада АҚШ-тың мемлекеттік хатшысы Марко Рубио Даниялық ресми тұлғалармен кездеспек.
