Жетісу облысындағы «Алтын-Емел» ұлттық паркінде құлан популяциясы жыл сайын тұрақты өсім көрсетіп келеді. Бұл жануарлар өңірге алғаш рет 1982 жылы «Барсакелмес» қорығынан әкелінген. Ол кезде парк аумағында небәрі 32 ғана құлан болған.
Бүгінде биологтар жүргізген соңғы санақ нәтижесі қуантты: «Алтын-Емелде» құлан саны 3,5 мыңнан асқан. Сарапшылардың айтуынша, бұл – Қазақстандағы ғана емес, бүкіл өңірдегі керқұланның ең ірі әрі тұрақты популяциясы.
Мамандар мұндай өсімді ұлттық парктегі қорғалатын режимнің күшеюімен, табиғи жайылымдардың жеткіліктілігімен және климаттық жағдайлардың құланға қолайлы болуымен байланыстырады.
