Алматы қаласындағы «Сокол» саяжай қоғамы аумағында балалар мінген жолаушылар автобусы жол апатына түсті. Автобуста 34 оқушы болған.
Полиция дерегінше, оқиға Hyundai Accent жеңіл көлігі автобуспен соқтығысқанда болған. Салдарынан жеңіл көлік жүргізушісі оқиға орнында жан тапсырса, оның жолаушысы ауруханада көз жұмды. Балалар мен автобус жолаушылары зардап шекпеген.
Желіде тараған видеода балалардың қорқып, рюкзактарын алып, автобустан жүгіріп шыққаны байқалады. Сондай-ақ жерде жатқан адамдарды көруге болады.
Алдын ала болжам бойынша, Hyundai жүргізушісі бұрылу кезінде автобустың жолын кесіп өткен. Қазір қылмыстық іс қозғалып, тергеу амалдары жүргізілуде. Іс Алматы облысы полиция департаменті басшылығының ерекше бақылауына алынған.
