Зачаган кентінде салынып жатқан 600 орындық жаңа мектептің құрылысы аяқталуға таяды. Білім ошағының ашылуына орай елді мекеннің инфрақұрылымын жақсарту бағытында да бірқатар жұмыстар атқарылуда.
Әсіресе, оқушылар мен ата-аналардың мектепке қатынау жолын ыңғайлы әрі қауіпсіз етуге ерекше көңіл бөлініп отыр. Осы мақсатта Сарыарқа көшесінен жаңа мектепке дейін және білім ошағынан Жәңгір хан көшесіне дейінгі жолдарда жөндеу жұмыстары басталды.
Қазіргі уақытта мердігерлер жолдың негізгі қабатын дайындау үстінде. Жоспар бойынша абаттандыру жұмыстары қыркүйек айының соңына дейін аяқталуы тиіс.
Жергілікті билік өкілдерінің айтуынша, жаңа жолдар пайдалануға берілген соң, оқушылардың мектепке жетуі анағұрлым жеңілдеп, көлік қозғалысының қауіпсіздігі артады. Бұл жоба тек білім беру саласына ғана емес, кенттің жалпы инфрақұрылымдық дамуына да оң ықпал етпек.
Айта кетейік, Зачаган кентіндегі медициналық колледж маңында бой көтеріп жатқан жаңа мектеп заманауи талаптарға сай салынып жатыр. Ол пайдалануға берілгеннен кейін ауданның білім беру жүйесіндегі жүктемені айтарлықтай азайтып, оқушыларға қолайлы жағдай жасайды.
