Астана іргесінде дәстүрлі жаппай велошеру өтіп, жазғы веломаусым ресми түрде ашылды. Шараға 700-ге жуық адам қатысты, деп хабарлайды Zhaiyqmedia.kz ақпарат агенттігі.
Биылғы шара тек спорттық жарыс қана емес, «Таза Қазақстан» республикалық экологиялық акциясымен ұштастырылды. Қатысушылар веложарыстан кейін қала көшелерін тазалауға атсалысты.
«Біз спорт пен экологияны біріктіргіміз келді. Велошеру – салауатты өмір салтын насихаттаса, тазалық акциясы қоршаған ортаға деген жауапкершілікті арттырады», – деді ұйымдастырушылардың бірі.
Жарысқа қатысушылар 10 шақырымдық қашықтықты жүріп өтті. Ең жас велосипедшіге 5 жас, ал ең егдесіне 70 жас болды. Шара соңында барлық қатысушыларға естелік сыйлықтар табысталды.
