Бюджеттен 600 мың АҚШ долларына әзірленген отандық ойынның сапасы сын көтермей, қоғамда үлкен дау тудырды, деп хабарлайды Zhaiyqmedia ақпарат агенттігі.
Жобаға қомақты қаржы жұмсалғанымен, нәтижесінде шыққан өнімнің танымалдылығы өте төмен болып, техникалық сипаттамаға мүлдем сәйкес келмегені анықталды.
Бастапқыда ойын 12 сағаттық геймплей ұсынып, қазақ мәдениетіне терең бойлауға мүмкіндік береді деп уәде етілген. Алайда іс жүзінде ойын процесі қысқа сессиялардан аспай, мәдениетке қатысты сұрақтар тым үстіртін болған.
«Бөлінген қомақты қаржы қайда жұмсалды? Неліктен күрделі RPG жанрындағы ойынның орнына арзанқол көшірме жасалды? Тендер өткізу кезінде заңбұзушылықтар болды ма?» деген сауалдар туындайды.
