Сурет: Ақорда
Мемлекет басшысы сыбайлас жемқорлыққа қарсы іс-қимыл мәселелері бойынша заңға қол қойды, деп хабарлайды Zhaiyqmedia.kz ақпарат агенттігі.
Құжат 2022–2026 жылдарға арналған сыбайлас жемқорлыққа қарсы саясат тұжырымдамасын іске асыру және халықаралық стандарттарды ұлттық заңнамаға енгізу үшін әзірленді. Заңда мүдделер қақтығысының алдын алу бөлігінде оның әлеуетті, нақты және орын алған түрлері ажыратылып, әрқайсысы үшін нақты мерзімдері бар әрекет алгоритмі белгіленді. Мүдделер қақтығысы жағдайында қабылданған актілер мен мәмілелер жарамсыз деп танылуы мүмкін.
Сыбайлас жемқорлыққа қарсы комплаенс-қызметтердің дербестігі күшейтілді: олар тек директорлар кеңесіне немесе байқау кеңесіне есеп береді, атқарушы органнан тәуелсіз жұмыс істейді және Агенттікпен тікелей байланысады.
Еңбек кодексіне цифрлық кадрлық жүйенің құқықтық негіздері енгізілді, бұл қызметке қабылдау кезінде мүдделер қақтығысын автоматты түрде анықтауға мүмкіндік береді. Сыбайлас жемқорлық тәуекелдерін жою шараларын қабылдамағаны және бағынысты қызметкерлердің құқық бұзушылықтары үшін мемлекеттік органдар басшыларының жауапкершілігі күшейтілді.
Жеке тұлғаларды әкімшілік жауапкершілікке тартудың талап қою мерзімі 1 жылдан 3 жылға дейін ұзартылды. Пара беруге уәде ету, пара ұсыну және пара талап ету үшін қылмыстық жауаптылық енгізілді. Бұл нормалар ЭЫДҰ-ға мүше 38 мемлекетте қолданылады және 2027 жылғы 1 қаңтардан бастап күшіне енеді.
Тұрмыстық сыбайлас жемқорлыққа қарсы іс-қимылда ауруханалар, мектептер, жоғары оқу орындары, банктер және коммуналдық қызмет көрсету ұйымдарындағы құқық бұзушылықтарға ерекше назар аударылды. Осы ұйымдардың қызметкерлеріне заңсыз сыйақы бергені үшін қылмыстық жауаптылық енгізіліп, ірі мөлшерде немесе қорқытып алу жолымен заңсыз сыйақы алғаны үшін жауаптылық күшейтілді. Сондай-ақ, Қылмыстық кодекс заңсыз сыйақы алуға арандатқаны үшін жауаптылықты көздейтін жаңа нормамен толықтырылды.
Заңдармен сыбайлас жемқорлыққа қарсы функциялар аражігі ажыратылды: Ұлттық қауіпсіздік комитеті құқық бұзушылықтарды анықтау мен тергеуді жүзеге асырады, ал Мемлекеттік қызмет істері агенттігі саясатты қалыптастыру мен іске асыруды қамтамасыз етеді.
