Қарағанды облысында жолаушылар автобусының қатысуымен ірі жол-көлік оқиғасы болып, бір адам қаза тапты және үш адам зардап шекті, деп хабарлайды Zhaiyqmedia ақпарат агенттігі.
Қайғылы оқиға 21 наурыз күні «Астана – Алматы» тасжолында, Сарышаған кентінің маңында болған. Рейстік автобустың 49 жастағы жүргізушісі жол жиегінде тоқтап тұрған Volvo маркалы ауыр жүк көлігіне соғылған. Сол сәтте автобус салонында 33 жолаушы болғаны анықталды.
Жол апаты салдарынан бір жолаушы оқиға орнында көз жұмды. Тағы үш адам түрлі дене жарақатымен ауруханаға жеткізілді.
Облыстық полиция департаменті жүргізушілерге демалыс режимін қатаң сақтап, жолда өте мұқият болу қажеттігін ескертті.
Фото: Әлеуметтік желіден
