Қазақстанның жұптық сындағы бірінші ракеткасы Анна Данилина Дохада өткен WTA 1000 турнирінде чемпион атанып, мансабында тұңғыш рет әлемнің 7-ракеткасы деңгейіне көтеріледі, деп хабарлайды Zhaiyqmedia ақпарат агенттігі.
Анна Дохадағы жарыста сербиялық теннисші Александра Круничпен бірге өнер көрсетті. Олар финалда латвиялық Елена Остапенко мен тайбэйлік Се Шувэй жұбымен кездесіп, үш сетте жеңіске жетті. Қорытынды есеп – 0:6, 7:6, 10:8.
Бірінші сетте бірде-бір гейм ала алмаған қазақстандық-сербиялық жұп екінші партияда 2:5 есебімен ұтылып жатып, матчболдан құтылып, тарихи камбэк жасады.
Жартылай финалда Данилина мен Крунич канадалық Габриэла Дабровски мен бразилиялық Луиза Стефаниден құралған мықты жұпты 6:3, 6:4 есебімен сенімді түрде жеңген болатын.
Бұл – Данилинаның жыл басынан бері қатысқан екінші ірі финалы. Бұған дейін ол Australian Open турнирінің финалында бақ сынаған еді.
Фото: Әлеуметтік желіден
