- Мемлекет басшысы Қасым-Жомарт Тоқаев АҚШ президенті Дональд Трамптың бастамасымен құрылған Бейбітшілік кеңесінің Жарғысына қол қойды, деп хабарлайды Zhaiyqmedia ақпарат агенттігі.
Қол қою рәсіміне Қазақстаннан бөлек тағы 18 мемлекеттің басшылары мен жоғары лауазымды өкілдері қатысты. Бұл бастама жаһандық қауіпсіздік пен тұрақтылықты нығайтуға бағытталғаны айтылады.
Қазақстанның бұл қадамға баруы – елдің бейбітшілік пен халықаралық ынтымақтастықты қолдауға бағытталған сыртқы саяси бағытының айқын көрінісі. Еліміз бұған дейін де ядролық қарудан бас тарту, медиация және жаһандық диалог алаңдарын құру сияқты көптеген бейбіт бастаманың ұйытқысы болған.
Ақорданың хабарлауынша, құжатқа қол қойғандар арасында тек мемлекет басшылары ғана емес, сонымен қатар түрлі елдердің жоғары лауазымды тұлғалары да бар. Бұл кеңестің халықаралық деңгейде кең қолдауға ие екенін көрсетеді.
Фото: Ақорда
