Батыс Қазақстан облысы мен Оңтүстік Корея өнеркәсіп, қайта өңдеу, ауыл шаруашылығы, денсаулық сақтау және экология салаларында ынтымақтастық орнатты. Бұл туралы келісімге облыс әкімі Нариман Төреғалиевтің Оңтүстік Кореяға жұмыс сапары барысында қол жеткізілді. Делегация құрамында дәрігерлер мен кәсіпкерлер бар.
Сапар аясында Орал қаласының ауруханаларынан келген 10 дәрігер Әулие Мария клиникасында тағылымдамадан өтеді. Бұл мүмкіндік БҚО әкімдігі мен оңтүстіккореялық клиника президенті қол қойған ынтымақтастық меморандумының нәтижесінде жүзеге асып отыр.
Сонымен қатар, енді Орал мен Инчхон қалаларының дәрігерлері айына бір рет бейнебайланыс арқылы консультация жүргізе алады, бұл тәжірибе алмасу мен кәсіби байланыстарды нығайтуға жағдай жасайды.
Бұл келісім өңірдің медициналық, өндірістік және экологиялық әлеуетін арттыруға, сондай-ақ халықаралық тәжірибе алмасуды дамытуға бағытталған.
