Қостанайда Рудный қаласының экс-прокуроры Мұрат Оспановқа сот үкімі шықты. Тергеу мәліметінше, ол құрылыс бөліміндегі тексерісті тоқтату үшін 20 миллион теңге көлемінде пара алуға оқталған.
Оспанов өз кінәсін толық мойындап, өкінген соң іс қысқартылған тәртіпте қаралды. Үш сот отырысынан кейін ол орташа қауіпсіздік мекемесінде 4,5 жылға бас бостандығынан айырылды. Сондай-ақ оған өмір бойы мемлекеттік қызметте жұмыс істеуге тыйым салынды және «әділеттің аға кеңесшісі» шенінен айырылды.
Сот үкімін шығару кезінде айыпталушының жас балалары бар екені және кінәсін мойындап, шын өкінгені жеңілдетуші мән-жай ретінде ескерілді.
Айта кетейік, Рудный қаласының прокуроры Мұрат Оспанов биыл қыркүйекте ішкі қауіпсіздік қызметі мен ҰҚК департаментінің бірлескен операциясы кезінде ұсталған болатын.
