Франция АҚШ-тың саясатына наразылық ретінде НАТО құрамынан шығу мәселесін көтерді. Тиісті резолюцияны елдің Ұлттық жиналысы төрағасының орынбасары Клеманс Гетте ұсынды, деп хабарлайды Zhaiyqmedia ақпарат агенттігі.
Депутат бұл бастамасын X әлеуметтік желісіндегі парақшасында жариялады. Ол Францияның АҚШ жетекшілік ететін әскери одаққа мүшелігінің тиімділігіне күмән келтірген.
«Соңғы кездері Францияның АҚШ-тың ықпалындағы және соның мүддесіне жұмыс істейтін НАТО-ға мүше болуының қаншалықты қажет екені жиі талқылана бастады. Мен альянстан кезең-кезеңмен шығуды, алдымен оның біріккен қолбасшылық құрамынан кетуді қарастыратын резолюция ұсындым», — деп жазды Клеманс Гетте.
Ол бұл қадамға баруына Вашингтонның соңғы әрекеттері түрткі болғанын атап өтті. Атап айтқанда, АҚШ-тың Венесуэла президенті Николас Мадуроны тұтқындауға ұмтылуы, Данияға тиесілі Гренландия аралына аумақтық талап қоюы және Палестинадағы жағдайға әскери тұрғыдан араласуы Францияның наразылығын тудырған.
Фото: Әлеуметтік желіден
