Сурет: pixabay
Орал қаласында көлік кептелістерінің жиілеуі мен жол-көлік оқиғаларының алдын алу мақсатында бірқатар көшелерде қозғалыс бағытына өзгеріс енгізіледі. Бұл туралы қалалық әкімшілік полициясымен келісім негізінде хабарланды.
2024 жылғы 18 желтоқсаннан бастап Коняхин көшесінің Самал көшесінен Тәуелсіздік көшесіне дейінгі жол учаскесінде көлік қозғалысы екіжақты режимнен біржақты қозғалысқа ауыстырылады. Аталған көшеге кіру Тәуелсіздік көшесі жағынан Самал көшесіне қарай жүзеге асырылады. Ал одан әрі қозғалыс бұрынғыдай екіжақты болып қала береді.
Сонымен қатар, №37 орта мектеп маңындағы жол бөлігінде де өзгеріс енгізіледі. Атап айтқанда, Самал көшесінен 72/1 үйге дейінгі аралықта көлік қозғалысы біржақты болады. Ал 72/1 үйден Тәуелсіздік көшесіне дейінгі бөлікте қозғалыс екіжақты режимде сақталады.
Қала билігі автокөлік жүргізушілерін орнатылған жол белгілерін қатаң сақтауға және жол қозғалысы ережелеріне мұқият болуға шақырды.
