Ақжайық ауданында сот саласында бірқатар маңызды кадрлық өзгерістер орын алып, ауданның сот органдарына жаңа басшылар тағайындалды. Бұл туралы Батыс Қазақстан облыстық соты мәлімдеді.
Жаңа лауазым иелерін таныстыру рәсімі аудан активінің қатысуымен өтіп, жиында БҚО сотының азаматтық істер жөніндегі апелляциялық сот алқасының төрағасы Турсын Уразова жаңа төрағаларды ресми түрде таныстырды. Ол сөзінде сот жүйесіндегі әділдік пен заңдылықты қамтамасыз етудің маңыздылығына тоқталып, тағайындалған басшылардың кәсіби тәжірибесі мен біліктілігіне жоғары баға лады.
Гүлжихан Темірболатқызы Сагитова:
Ақжайық аудандық сотының төрағасы қызметіне тағайындалған Гүлжихан Сагитова – құқықтану саласында жоғары білім алған, сот жүйесінде көп жылдан бері еңбек етіп келе жатқан тәжірибелі маман. Бұған дейін ол Ақжайық аудандық сотында судья болып қызмет атқарып, кәсібилігімен және заңға адалдығымен танылған.
Тамара Сәлімжанқызы Гумарова:
Ақжайық аудандық №2 сотының төрағасы лауазымына тағайындалған Тамара Гумарова да – заң саласының білікті өкілі. Ол жаңа қызметіне дейін Сырым аудандық сотының төрағасы қызметін атқарған. Көп жылдық тәжірибесі мен ұйымдастырушылық қабілеті оның жаңа лауазымын абыроймен атқаруына негіз.
Іс-шараға қатысушылар жаңа төрағаларды құттықтап, олардың жұмысына табыс тіледі. Сонымен қатар қоғам алдындағы зор жауапкершілікті сезіне отырып, әділ әрі заңға сүйенген шешімдер қабылдау қажеттілігі атап өтілді.
Жергілікті тұрғындар сот жүйесіне деген сенімнің артуы – кәсіби мамандардың сапалы қызметіне тікелей байланысты екенін айтып, жаңа төрағаларға қолдау білдірді.
Сурет: Ақжайық ауд әкімдігі
