Түркістан облысынан шақырылған сарбаз Отар маңындағы 30212 әскери бөлімінде саусақтарын әдейі шапқан. Оқиға әскери бөлімдегі таңғы тексеріс кезінде тіркелген, деп хабарлайды Zhaiyqmedia ақпарат агенттігі.
HALYQSTAN дереккөзіне сүйенсек, сарбаз қалталық құжаттарын тумбочкада қалдырғаны үшін ескерту алған.
«Таңғы сап кезінде Түркістан облысынан келген сарбазға құжаттарын жастық астында қалдырғаны үшін ескерту беріліп, кері жіберілген. Сол кезде ол өрт сөндіру қалқанын ашып, балтаны алып, бірнеше саусағын кесіп тастаған», – деді дереккөз.
Ал Құрлық әскерлерінің баспасөз қызметі бұл оқиға 2026 жылдың 6 қаңтарында Гвардиялық гарнизондағы бөлімдердің бірінде болғанын растады. Бірақ олардың ақпараты өзгеше.
«Әскери қызметші сол қолының саусақтарын металл затпен жарақаттаған. Ол дереу әскери госпитальге жеткізілді. Дәрігерлер уақытылы көмек көрсетті», – деп мәлімдеді Құрлық әскерлерінен.
Ресми мәліметке сәйкес, сарбаз мұндай қадамға жеке себеппен барғанын айтқан. Оқиғаның қызметпен не командирлердің әрекетімен еш байланысы жоқ.
«Жарақатқа байланысты командирдің ескертуі себеп болды деген ақпарат шындыққа жанаспайды», – деді Құрлық әскерлерінің өкілдері.
Болған жайт бойынша қылмыстық іс қозғалды. Арнайы комиссия оқиғаны тексеріп жатыр. Жағдай әскери басшылықтың бақылауында.
