Ақтөбе облысында тұрғындарды көгілдір отынмен қамту жұмыстары жүйелі түрде жалғасуда. Облыс әкімдігі мен энергетика басқармасының мәліметінше, биылдың басынан бері 16 елді мекен газға қосылған. Жыл соңына дейін тағы 12 ауылға газ құбырын тарту жоспарланып отыр.
Бүгін Мәртөк ауданындағы Бөрте, Қызылжар және Шевченко ауылдарына алғаш рет табиғи газ берілді. Бұл – шамамен 1000-ға жуық тұрғын үшін көптен күткен қуаныш. Жергілікті халықтың айтуынша, енді олар қатты отын сатып алып, көмір жағып әуре болмайды. Газдың келуі тұрмыс сапасын едәуір жақсартып, экологияға да оң әсерін тигізбек.
Облыс әкімдігі жобаның кезең-кезеңімен іске асатынын атап өтті. Келесі кезекте аудандағы басқа елді мекендерге де газ құбырын тарту жоспарланып отыр.
