Сурет: Egemen Qazaqstan
14 маусымда Швейцарияда көші-қон саясатын қатаңдату мәселесі бойынша референдум өтеді. Егер халық «иә» деп дауыс берсе, ел Шенген аймағынан шығуы мүмкін, деп хабарлайды Zhaiyqmedia.kz ақпарат агенттігі.
Оңшыл SVP партиясының бастамасымен өткізіліп отырған бұл референдумда халық санын 2050 жылға дейін 10 миллион адаммен шектеу ұсынылып отыр. Қазіргі таңда Швейцарияда 8,9 миллион адам тұрады.
SVP партиясының жетекшісі Марсель Деттлинг: «Біздің елімізге көші-қон ағыны тым көп. Халқымыздың санын бақылауға алуымыз керек. Шенген аймағы бізге бұл мүмкіндікті бермей отыр», — деді.
Егер референдумда «иә» дегендер көпшілік болса, Швейцария Шенген аймағынан шығуға мәжбүр болады. Бұл Еуропадағы еркін қозғалыс ережелеріне қайшы келеді және Еуропалық Одақпен қарым-қатынасты күрделендіруі мүмкін.
Қарсыластар бұл қадам Швейцария экономикасына кері әсер етеді деп ескертеді. Өйткені шетелдік жұмысшылар мен мамандарсыз елдің кейбір салалары тоқырауға ұшырауы ықтимал.
