Украина президенті Владимир Зеленский Ресейдің жаппай соққыларынан кейін елдегі энергетика саласында төтенше жағдай туындағанын мәлімдеді. Оның айтуынша, Киевтегі ахуалға ерекше назар аударылып отыр, деп хабарлайды Zhaiyqmedia ақпарат агенттігі.
Ресей соққылары мен ауа райының нашарлауының салдары өте ауыр. Жөндеу бригадалары, энергетикалық компаниялар, коммуналдық қызметтер мен Төтенше жағдайлар қызметі электр қуаты мен жылуды қалпына келтіру үшін тәулік бойы жұмыс істеп жатыр. Шұғыл шешімді қажет ететін мәселелер көп, – деп жазды ол әлеуметтік желіде.
Украина басшысының сөзінше, Киевтегі жағдайды үйлестіру үшін арнайы штаб құрылады. Ал елдің энергетика саласына төтенше жағдай режимі енгізілмек.
Сонымен қатар қажетті жабдықтар мен қосымша қолдау алу үшін Киевтің халықаралық серіктестерімен жұмыс күшейтіледі.
Бұдан бөлек, Зеленский үкіметке коменданттық сағат ережелерін қайта қарауды тапсырды.
