Қазақстандық ғалымдар инсульттан кейінгі науқастарды оңалтуға арналған жасанды интеллект негізіндегі медициналық экзоскелет жасап шығарды. Бұл технология халықаралық деңгейде танылып, реабилитация саласында жаңа мүмкіндіктер ашады, деп хабарлайды Zhaiyqmedia.kz ақпарат агенттігі.
Жаңа құрылғы инсульттан кейін қозғалыс қабілетінен айырылған адамдардың аяқ-қол функциясын қалпына келтіруге көмектеседі. Экзоскелет жасанды интеллект алгоритмдерімен жұмыс істейді, яғни пациенттің жеке ерекшеліктеріне бейімделіп, оңалту процесін тиімді етеді.
«Біздің мақсатымыз – инсульттан кейінгі науқастардың өмір сапасын жақсарту. Жасанды интеллект экзоскелеттің әр қимылын нақты бақылап, қателіктерді болдырмауға мүмкіндік береді», – деді жоба жетекшісі, профессор Ерлан Серікқалиев.
Құрылғы әзірге сынақтан өтіп жатыр, бірақ алғашқы нәтижелер көңіл көншітеді. Қазақстандық өнім шетелдік аналогтардан арзан әрі қолдануға ыңғайлы болуы тиіс. Ғалымдар экзоскелетті жақын арада еліміздің оңалту орталықтарына енгізуді жоспарлап отыр.
