Қазақстанда алғаш рет литий-ион батареяларын қайта өңдеу жобасы іске қосылды. Әл-Фараби атындағы Қазақ ұлттық университетінің зерттеушілері бұл бастаманы қолға алып, экологиялық мәселелерді шешуге үлес қоспақ, деп хабарлайды Zhaiyqmedia.kz ақпарат агенттігі.
Жоба аясында ғалымдар ескірген батареялардың құрамындағы қымбат металдарды бөліп алып, оларды қайта пайдалануды жоспарлап отыр. Бұл технология Қазақстан үшін мүлдем жаңа бағыт саналады.
«Біздің зерттеуіміз литий-ион батареяларын қайта өңдеу арқылы қоршаған ортаға зиянды қалдықтарды азайтуға мүмкіндік береді. Сонымен қатар, шикізатты үнемдеуге де септігі тиеді», — дейді жоба жетекшісі, профессор Асқар Серікқалиев.
Қазіргі уақытта зерттеушілер батареялардан литий, кобальт және никель сияқты элементтерді бөліп алудың тиімді әдістерін сынақтан өткізуде. Алдағы уақытта бұл әдісті өнеркәсіптік деңгейге жеткізу жоспарланған.
