Мемлекет басшысы Қасым-Жомарт Тоқаев Қазақстан халқын ұлттық бірлік мерекесімен құттықтады, деп хабарлайды Zhaiyqmedia.kz ақпарат агенттігі.
Президенттің айтуынша, бұл күн – әртүрлі этнос пен дін өкілдерінің татулығы мен ынтымағының символы. Ол елдегі тұрақтылық пен келісімнің арқасында Қазақстан даму жолында зор жетістіктерге жеткенін атап өтті.
«Біздің басты байлығымыз – бірлік пен татулық. Осы құндылықтарды сақтай отырып, болашақта да биік белестерді бағындырамыз», – деді Президент.
Мереке қарсаңында еліміздің түкпір-түкпірінде, соның ішінде Батыс Қазақстан облысында да мәдени шаралар өтіп жатыр. Орал қаласында ұлттық өнер ұжымдарының концерті ұйымдастырылды.
