Атырау облысында елді мекеннен тыс жерден ұшқышсыз ұшу аппаратының бөлшектеріне ұқсас заттар табылып, полиция мен арнайы қызметтер тексеру жұмыстарын бастады, деп хабарлайды Zhaiyqmedia ақпарат агенттігі.
Облыстық полиция департаментінің мәліметінше, табылған нысан елді мекендерден алыс жерде жатыр. Қазіргі уақытта оқиғаның барлық мән-жайы анықталып жатыр.
Бұл шекаралас аймақтарда тіркелген алғашқы жағдай емес. 26 наурызда Батыс Қазақстан облысының Ақжайық ауданында да осындай ұшақ сынықтары табылған болатын. Ал ақпан-наурыз айларында БҚО аумағында тағы төрт аппараттың құлағаны белгілі болды.
Қорғаныс министрлігі БҚО-да табылған дрондардың басым бөлігі Ресей Федерациясының 926-бас ұшу-сынақ орталығының полигоны аумағына құлағанын түсіндірген еді. Ведомствоның хабарлауынша, бұл әуе кеңістігін ресейлік әскерилер пайдаланады.
Фото: Әлеуметтік желіден
