Қазақстанда газды есептеудің жаңа жүйесі енгізілмек: тұрғындардың үйіндегі ескі есептегіштер деректі қашықтан жіберетін «ақылды» құрылғыларға ауыстырылады, деп хабарлайды Zhaiyqmedia ақпарат агенттігі.
Қазір Мәжіліс осындай жаңа есептеуіш құралдарына көшу туралы заң жобасын қарап жатыр. Бүгінде абоненттердің тек 5 пайызы ғана «ақылды» есептегішті пайдаланады, ал қалғаны көрсеткіштерді ай сайын қолмен тапсыруға мәжбүр.
Тұтынушылар үшін ең басты жаңалық – жаңа құрылғылар тұрғындардың емес, газбен жабдықтаушы ұйымдардың қаражатына орнатылады. Бір есептегіштің құны шамамен 37 мыңнан 55 мың теңгеге дейін жетеді.
Бұл жобаны қаржыландыруды «QazaqGaz Aimaq» пен ұлттық оператор «QazaqGaz» өз мойнына алады. Сонымен қатар процестерді цифрландыру арқылы үнемделген қаражат та осы мақсатқа жұмсалмақ.
Ведомство өкілдерінің айтуынша, нарықта қажетті көлемде құрылғы шығаруға дайын бірнеше отандық өндіруші бар.
Фото: Әлеуметтік желіден
