Қазақстанда ауыл шаруашылығы жерлерін жалға беру конкурсының ережелеріне маңызды өзгеріс енгізілді. Енді жерді иеленгісі келетін кез келген үміткер алғашқы бес жыл ішінде әр гектарға қанша қаражат құятынын нақты көрсетуі тиіс, деп хабарлайды Zhaiyqmedia ақпарат агенттігі.
Бұл жаңашылдық 2025 жылдың тамызынан бастап күшіне енеді. Биліктің мақсаты – жерді алып, оны игермей бос қалдыратын кәсіпкерлерден арылу. Яғни, конкурсқа нақты жоспары мен қаржылық мүмкіндігі бар азаматтар ғана қатыса алады.
Сонымен қатар, үміткерлерді іріктеу кезінде олардың ауыл шаруашылығы техникасы мен жабдықтарының болуы, мал басының саны және білікті мамандарының бар-жоғы ескеріліп, қосымша ұпай беріледі. Бұл – жерді тиімді пайдаланудың кепілі.
«Бұл өзгерістер конкурстың ашық әрі әділ өтуін қамтамасыз етеді. Ең бастысы, жер нағыз еңбек етемін деген адамның қолына тиеді», – деді Жер ресурстарын басқару комитетінің төрағасы Мұрат Теміржанов.
