Қазақстан Қарашығанақ жобасы бойынша халықаралық арбитражда Eni, Shell және басқа да ірі мұнай компанияларын жеңіп шықты. Лондон соты Қазақстанның талап-арызын ішінара қанағаттандырып, енді консорциум бюджетке миллиардтаған доллар төлеуі мүмкін, деп хабарлайды Zhaiyqmedia ақпарат агенттігі.
Bloomberg агенттігінің хабарлауынша, Қазақстан үкіметі жоба серіктестері артық шығындар мен расталмаған шығыстарды мемлекет есебінен заңсыз өтеген деп айыптаған. Лондон соты Қазақстанның осы уәжімен келісіп, бұл сомалар өнімді бөлу туралы келісім аясында өтелуге жатпайды деген шешім шығарды.
Компаниялар талаптың бір бөлігін ескіру мерзіміне байланысты жабуға тырысқан, алайда сот бұл әрекетті қабылдамады.
Әзірге төлемнің нақты сомасы белгіленбеді. Дегенмен, алдын ала бағалау бойынша, ол екі мен төрт миллиард доллар аралығында болуы мүмкін. Бұл қаражат келісімшарттағы мұнайды бөлу формуласын түзету арқылы бюджетке қайтарылады. Консорциумның әлі де апелляцияға шағымдануға мүмкіндігі бар.
Арбитражға Eni мен Shell компанияларынан бөлек жобаның басқа да ірі акционерлері – Chevron, «Лукойл» және «ҚазМұнайГаз» қатысты. Сот процесі Лондонда Стокгольм арбитражының ережелеріне сәйкес өтті.
Бұған дейін Қазақстан Қашаған инвесторларына қарсы экологиялық заң бұзушылықтарға қатысты төрт миллиард доллардың сотында жеңіліп қалған еді.
Фото: ҚМГ
