Президент Қасым-Жомарт Тоқаев қазақстандық банктердің бірі көрші елден капитал шығарудың делдалына айналғанын мәлімдеді. Оның айтуынша, бір жыл ішінде осы схема арқылы 7 триллион теңгеден астам қаражат шетел асырылған, деп хабарлайды Zhaiyqmedia ақпарат агенттігі.
Мемлекет басшысы бұл деректі Қаржылық мониторинг агенттігінің басшысы Жанат Елимановқа сілтеме жасай отырып келтірді.
«Бір жыл ішінде 7 триллион теңгеден астам қаражат басқа елдерге аударылған», – деді Президент.
Бұл – шамамен 13 миллиард АҚШ долларына тең өте ірі сома. Сарапшылардың пайымдауынша, банк тек комиссияның өзінен орасан зор пайда тапқан болуы мүмкін.
Алайда ақшаның нақты қай көрші елден (Ресей немесе Қытай болуы ықтимал) шығарылып, қай мемлекеттерге (мысалы, БАӘ, Түркия) аударылғаны әзірге белгісіз. Сондай-ақ, бұл операцияға қай банктің қатысы бары да айтылған жоқ. Дегенмен, мұндай ірі көлемдегі аударымды тек нарықтағы ірі ойыншы ғана жүзеге асыра алатыны анық.
Президенттің бұл мәселені көпшілік алдында көтеруінің астарында үлкен мән жатыр. Енді бұл қаржы ұйымына Қазақстан билігі немесе халықаралық қадағалаушы органдар тарапынан қатаң шаралар қолданылуы әбден мүмкін.
Фото: Әлеуметтік желіден
