12 наурыздан бастап еңбек шартын арнайы жүйеге енгізбеген немесе қате толтырған жұмыс берушілерге салынатын айыппұл мөлшері өседі, деп хабарлайды Zhaiyqmedia ақпарат агенттігі.
Әкімшілік жауапкершілік еңбек шартын Еңбек шарттарын есепке алудың бірыңғай жүйесіне (ЕШЕБЖ) мүлдем енгізбеген, кешіктіріп тіркеген, мәліметті толық көрсетпеген немесе жалған дерек енгізген жағдайда қарастырылған.
Тіпті келісімшартта қызметкердің ЖСН/БСН, лауазымы, жұмыс орны, шарт мерзімі, басталу күні, құжаттың нөмірі мен күні сияқты міндетті деректердің бірі болмаса да, құжат қате толтырылған болып саналады.
Заң бойынша жаңа келісімшартты 5 жұмыс күні ішінде, оған енгізілген өзгерістерді 15 күнде, ал қызметкерді жұмыстан шығару туралы ақпаратты 3 жұмыс күні ішінде жүйеге енгізу керек. Қатені түзетуге 30 жұмыс күні беріледі.
Алғашқы ереже бұзушылық үшін айыппұл мөлшері келесідей: лауазымды тұлғаларға – 30 АЕК (129,7 мың теңге), шағын бизнеске – 60 АЕК (259,5 мың теңге), орта бизнеске – 80 АЕК (346 мың теңге), ал ірі кәсіпорындарға – 150 АЕК (648,7 мың теңге).
Егер заң бұзушылық бір жыл ішінде қайталанса, айыппұл мөлшері екі еселеніп, 200 АЕК-ке дейін жетуі мүмкін.
Еңбек және халықты әлеуметтік қорғау министрлігінің мәліметінше, қазіргі таңда жүйеде 6,3 миллион еңбек шарты тіркелген. Бұл – жалпы көрсеткіштің 91 пайызы.
